UKA 2001/25
Pisortanit pensionisiat pillugit Inatsisartut peqqussutaata allannguutaatut Inatsisartut peqqussutissaattut siunnersuut
Nassuiaatit nalinginnaasut
Inatsisartut 2001-imi upernaakkut ataatsimiinnerminni piginnaanngorsaaqqinnissamut ikiorsiisarneq pillugu Inatsisartut peqqussutaat nr. 4, 31. maj 2001-imeersoq 1. januar 2002-mi atuutilersussanngorlugu akuersissutigaat. Tamatuma kinguneranik pisortanit pensionisiat pillugit inatsisartut peqqussutaannut allannguutissatut siunnersuut saqqummiunneqarpoq.
Piginnaanngorsaaqqinnermut ikiorsiisarneq pillugu inatsisartut peqqussutaata akuerineqarneranut atatillugu siusinaartumik pensionisianut aningaasalersuinerup allannguuteqartinneqarsimanerata kingunerisaanik, aningaasalersuinermut aalajangersakkanut allannguutissatut siunnersuut saqqummiunneqarpoq.
Pisortanit pensionisiat pillugit peqqussutissatut nutaarluinnartut siunnersuut tusarniaassutigineqarsimavoq kommuninut, sulisartut kattuffiinut, sulisitsisunut, utoqqaat peqatigiiffianut kiisalu Namminersornerullutik Oqartussat iluanni. Tusarniaanermi akissuteqaatini siunnersuummi aalajangersakkat allannguuteqartussatut siunnersuusiorfigineqartut pillugit oqaaseqaateqartoqarsimanngilaq.
Pisortanit pensionisiat pillugit inatsisartut peqqussutaata annertunerusumik allannguuteqartinnissaa kinguartinneqarpoq. Tamatumunnga pissutaasut pingaarnersaraat ukioq manna Inatsisartut ukiakkut ataatsimiinneranni utoqqaat aningaasaqarniarnikkut atugarisaat pillugit nassuiaammik saqqummiussisoqartussaanera. Misissuisimanermi paasisat pensionisianut peqqussummut ilanngunneqarnissaannik siunnersuummik 2002-mi saqqummiussisoqarnissaa naatsorsuutigineqarpoq.
Allannguutit siuliini taaneqartut saniatigut saqqummiunneqarput ikaarsaariarnermi aalajangersagassatut siunnersuut.
Aningaasatigut allaffissornikkullu kingunerisassat
Siunissami siusinaartumik pensionisiaqalertussanut aningaasartuutit affai Nunatta Karsianit affaalu kommunimit aningaasartuutigineqassapput. Kommunit aningaasartuuteqarnerulernissaat
KANUKOKA-mut ataatsimoortumik tapiissutit pillugit isumaqatiginninniarnermi ilanngunneqareerput.
Siusinaartumik pensionisiallit 2002-imi amerleriassagatinneqarnerat naqqiissuteqarfigineqarpoq, paasissutissat sukumiinerusut aammalu 2000-imi 2001-imilu aningaasartuutaasimasunik takussutissat kingunerisaannik. Tamanna tunngavigalugu kommuninut aningaasartuutaanerulersussat ataatsimoortumik tapiissutitigut matussuserneqaraluartut Nunatta Karsiata siusinaartumik pensionisianut aningaasartuutissat annikinnerussangatinneqarput. Sipaarutissaq taanna 1. januar 2002-ip kingorna kommunit piginnaanngorsaaqqinnermut aningaasartuutaasa 50%-iannut matussutissatut atorneqassaaq.
Siunnersuut allaffissornikkut kinguneqassangatinneqanngilaq.
Aalajangersakkanut ataasiakkaanut nassuiaatit
§ 1-imut
Nr. 1 - 3:
Piginnaanngorsaaqqinneq pillugu inatsisartut peqqussutissaattut siunnersuutip akuersissutigineqarnerata kinguneranik §§ 15-imi aamma 16-imi allannguutissanik siunnersuuteqartoqarpoq, taakkununnga innersuussuteqarsinnaanngorlugu. Erseqqissaatigineqassaaq piginnaanngorsaaqqinniaqqaarani siusinaartumik pensionisiaqalersitsisoqarsinnaammat, tamatumuuna pensionisiaqalernissamik qinnuteqartoq annikitsuinnarmik inuussutissarsiorsinnaassuseqarpat, taamaattumillu piginnaanngorsaaqqinnissaq siunertaqanngitsutut nalilerneqarpat.
Nr. 4 - 5:
§ 33-mi aningaaasalersuinermut aalajangersakkat ataatsimoortumik tapiissutit pillugit kommuninut isumaqatigiissummut naapertuuttunngorlugit allanngortinneqarput.
Erseqqissarneqarpoq utoqqalineq pissutigalugu pensionisianut aningaasartuutit 90 %-ii Nunatta Karsianit aningaasartuutigineqassasut, utoqqalineq pissutigalugu pensionisialinnit kommunit akileraarutitigut isertitaqaatigisartagaat eqqarsaatigissagaanni, tamakkiisumik aningaasartuutaasartut taakku naligaat.
Aammattaaq erseqqissarneqarpoq pensionisialinnut kommunit aggornerisa avataanni kiisalu Naalagaaffeqatigiinnerup avataani najugalinnut pensionisianut aningaasartuutit Nunatta Karsianit aningaasartuutigineqassasut.
Inunnut kommunimi aalajangersimasumik najugalinnut inummut tapinut aningaasartuutit kiisalu peqqussut naapertorlugu allaffissornermut aningaasartuutit oqartussaasumit sullissisuusumit akilerneqartartussat kommunimit akilerneqartassapput. Kommunit aggornerisa avataani Naalagaaffeqatigiinnerullu avataani aalajangersimasumik najugalinnut aningaasartuutit Naalakkersuisunit akilerneqartassapput.
Siusinaartumik pensionisianut 1. januar 2002-mit siusinnerusumik ullulimmik akuersissutigineqarsimasunut aningaasartuutit Nunatta Karsianit aningaasartuutigineqarnissaat ingerlaannassaaq. Tamanna paragraffitut nutaatut ilanngunneqarpoq ulloq killiffigisassaq aallarteqqiffigisassarlu malunnartinniarlugit.
Nr. 6:
§ 36a-mi ikaarsaariarnermi aalajangersagaq siunnersuutigineqarpoq, inuk pensionisiaqalerniarluni 1. marts 1999 sioqqullugu qinnuteqarsimatillugu, kisiannili suliassaq aatsaat tamatuma kingorna suliarineqarsimatillugu, suliassanik suliarinninnermi maleruagassat suut atorneqassanersut nalornissutaalersinnaanera pinngitsoorniarlugu.
§ 2-mut
Piginnaanngorsaaqqinnissamut ikiorsiisarneq pillugu Inatsisartut peqqussutaata atortuulerneranut aamma siusinaartumik pensionisianut aningaasalersuinerup allannguuteqarnerani ullut assigiinngissuteqalernerannut peqatigitillugu allannguutit atortuulersinneqarput.